蘇韻姿（Andrea）2016年參選港姐後入行，憑無綫處境劇《愛．回家之開心速遞》熊心如（紅衫魚）一角成功入屋，但去年被指因工作態度差遭雪藏，近日傳出她離巢消息，今午（9日）她亦在社交網發長文正式宣布離巢。
Andrea曾在《萬千星輝頒獎典禮》獲提名三次「最佳女配角」及兩次「飛躍進步女藝員」。至去年初遭踢出《愛》劇組，隨後雖有參與《濠玩夏水禮》等綜藝，之後亦有演出劇集《非份之罪》、《黑色月光》等，但工作量明顯下降，亦始終未能回歸《愛》劇。
已於無綫官網藝員名單中被下架的Andrea，其ig帳戶介紹欄亦刪去無綫經理人聯絡資料。今午Andrea在ig貼出當年參加港姐時的照片，撰長文交代去向並承認離巢，留言：「𠵱家係時候要跳出自己嘅舒適圈，接受新嘅挑戰啦。不經不覺嚟咗香港八年，我已經成長咗好多，學到好多嘢。喺呢一度遇到好多錫我嘅人，實在係好幸運。」
Andrea跟住逐一多謝高層曾勵珍、樂易玲、曾志偉、《愛》劇監製林建祥、《黑》劇監製鍾澍佳及綜藝監製、熊家人及一眾台前幕後。她坦言演熊心如，「令到多咗人認識我」，及多謝熊家人，「冇家人喺香港嘅我，感恩有你哋就有家嘅感覺」。
蘇韻姿ig全文：
依家係時候要跳出自己嘅舒適圈，接受新嘅挑戰啦。
不經不覺嚟咗香港八年，我已經成長咗好多，學到好多嘢。喺呢一度遇到好多錫我嘅人，實在係好幸運。
首先要多謝珍姐，喺我一個人嚟到香港嘅時候，俾機會我演熊心如，令到我喺香港都可以有一個家。亦都令到多咗人認識我、有不同嘅工作，學到好多中文。多謝您咁多年嘅教導栽培。我會好好緊記你教我嘅一切。
多謝樂小姐，由選美到入行，一路都好照顧住我，教我點樣做好一個藝人。仲有Management嘅同事，多謝你哋一直嘅照顧及幫忙，我會加倍努力！
多謝志偉哥！你嘅指導，加上鼓勵，令到我發現自己可以有好多可能性。我會keep住你俾我嘅正能量。
多謝監製祥哥！喺拍攝愛回家呢幾年嘅鼓勵、你對拍戲嘅熱情、創作力，有直啟發我，真係好榮幸能夠同你合作！
多謝監製佳導，俾個好好嘅機會我參與黑色月光，令到我見識多咗，學咗好多嘢，非常期待套劇播出！
仲有好多謝俾機會我嘅綜藝監製們，我知道自己嘅經驗少，所以感激你哋信任，俾我去嘗試不同嘅工作！
多謝熊家人，冇家人喺香港嘅我，感恩有你哋就有家嘅感覺。
最後要多謝關心同錫我嘅台前幕後朋友仔！等緊埋位，或者收工嘅時候都會同大家一齊傾偈。我會記住一齊渡（度）過過嘅美好時光！
相信喺未來大家一定能夠再遇到，亦都想藉呢個機會衷心祝福所有朋友，能夠在自己嘅舞台上發光發亮。
